يوميات نصحى شملول

يوميات نصحى شملول
شخصية حقيقية من قلب الاحداث المصرية

نصحى شملول ...مين هوه ؟ وايه جنسيته ؟ فين عمله ؟ وايه مهنته ؟ .................
نصحى شملول ...يا ترى مين هوه ؟ هو انا ، ولا انت ، ولا بياع البطاطا على الكورنيش ، ولا بياع الطماطم فى سوق العبور عمال ينادى : مجنونة يا قوطة الكيلو بخمسة جنيه ، ولا يا ترى هو الفران الحران ولا بياع العيش الجعان ، ولا يمكن هو النجار اللى عايش فى عشة فوق جبل المقطم من غير باب ولا شباك وزى مبيقولوا باب النجار مخلع ولا يمكن هو الموظف الكحيان اللى بيستلف من نص الشهر عشان يقدر ياكل ويشرب ويصرف على العيال واهو مطحون كمان فى جمعيات وسلف عشان يقدر يعيش .
وبعد طول بحث وتدوير ولف وتنطيط فى الشوارع والاحياء والحوارى والازقة والمواقع النتية (اقصد يعنى على النت ) وبعد سؤال جيرانه وحبيبه وناسه واهله وقريبة حسنى وحسين وحسن وحسنين ومسرور وبعرور وناصح وعايد ورفعاوى ومصراوى وغرباوى وشرقاوى وجيزاوى ومنياوى وماجدة وفادية وعايدة ونادية وسنية والبت نملية وحموكشة وحموءة والواد بلية واخوه زرادية وناس كتير ماليين شوارعنا المصرية من اسكندرية والسلوم للمنيا والفيوم ومن سينا والبحر الاحمر للخارجة والوادى الجديد واللى عايشين فى حواريينا فى القاهرة والجيزة من العتبة وبولاق للسيدة والحسين ومن اللى فى الخانكة والوايلى للى فى الحلمية والقللى .................
المهم بعد طول عناء ومن غير ما اطول عليكم وبسؤال كل حبيبنا دول كلهم اجمعوا على انهم يعرفوه وشافوه وقابلوه وكلموه ، وخدوا منه وادوه ، وسلموا عليه وهنُوه ، وزعلوا منه ولاموه .
وقالوا كمان انه بيشتغل صحفى يمكن مجهول فقران كحيان عايش زهقان ياكل طقة والتانية مفيش ، مش عارفين بيحب ولا لأ ، حيقدر يجوز ولا مش فاضى او مش راضى .......وقالوا كمان انه شغال فى جريدة صغيرة قوى بتصدر اسبوعيا ومحدش كتير بيقراها ولكنه بيحلم انه يكون صحفى كبير واسمه لامع فى الجرايد والمجلات ومفيش مانع يعمل برنامج ولا اتنين ويا سلام لو يكونوا فى الجزيرة ولا دريم وكان دايما يقول عن نفسه ...................

نصحى شملول صحفى مجهول
فى كل مكان داير ميدور
وحييجى اليوم وحكون مشهور
يا صحافى كبير يا رئيس تحرير

وقالوا انه واد تمام قوى وخلوق وجدع واد عترة ومجدع دايب فى عشق صاحبة الجلالة ووخداه من كل حاجة حتى حياته ، عايش قضايا بلاده وبيحب مصر قوى وبيعشقها قوى وهو مصرى صميم من اب وام مصريين واصله ضارب فى جذورها وتاريخها وحضارتها وعمره ما حيتخلى عن مصر او يسبها او يبعد عنها ولا عمره حيتاجر فيها او يبعها حتى لو سرقوه او نهبوه او ضربوه ولا هانوه او زوروا الانتخابات قدام عينه او حرموه من ابسط حقوقه فى الاكلة الحلوة والشربة الهنية والهدمة النضيفة والنومة المريحة ولو حتى سجنوه او وصلت العملية وشنقوه برضه بيحب مصر ومستحمل لاجل مصر وعايش شايل همومها ........
واخيرا حيكون لينا حلقات مع نصحى ويومياته وهو بيلف مصر وبيمر على حواريها وشوارعها بيكلم ناسها واهاليها بيشوف مشاكلها وازماتها بالكلمة والصورة مع كل حدث وكل مناسبة......

والى اللقاء مع اول حكاية من حكاوى شملول.